SHILLONG: Adita salrangna skang, Mawlai Mawroh-o nok rikenggipa mande saksako ma·sina man·gijagipa manderangni so·ote galahani gimin Voice of the People’s Party (VPP)-ba raken jegalataha aro a·doko niam retirangko rakkichina a·dok sorkario dabiangaha.
“India a·songni niam bidikko rakkigipa aro niam retiko mande ra·gipa ong·e Mawlai Mawroh-o kam ka·gipa mande saksako so·ote galanina VPP raken jegalenga. Darangba mandeni janggiko ra·na gita bil dongja. A·gilsak aro a·songni niamoba pilak jat aro toromni mande sakantian janggi tangna gita bilko man·a,” ine Sukrobar salo, VPP-ni ku·wattimgipa Batskhem Myrboh parakataha.
A·doko niam retirangko rakkichina gita a·dok sorkariko didiatengon, “Meghalaya a·doko bilrangko jakkalsretanina aro bilo ong·enggipa manderangni kakket ong·jani gimin indinan mingsingako man·aha aro da·o ia a·sel ong·anichi a·dokna namgija bimingko ra·badapaha,” ine VPP-ni ku·wattimgipa parakataha.
Re·anggipa March jani 27 tariko, CAA-ko jegale dingtang dingtang dolrangni Ichamati-o jinma re·jomaniko ong·atangani ja·man gipin jat mande sakgniko ma·sina man·gijagipa manderang so·ote galahachim aro uni ja·man re·anggipa Budbar saloba Shillong songjinmani Mawlai Mawroh jolo nok rikenggipa mande sakgittamko mikkang katipgipa manderangni chadrapanichi sakgittamoni saksade siangna gita nangahachim.
