TURA: Lok Sabha election-na campaign ka·engmiting somoio pilak dolrangan, niam gri gue badinganichi gue bagan dake cha·enggipa manderangna noksan ong·na nangengani gimin ku·rangko on·tokengoba iani bidingo National People’s Party (NPP)-ni president aro a·dokni Chief Minister Conrad K Sangma-de maming ku·rang on·anirang dongskajaengani gimin Garo Hills-o gue bagan dake cha·enggipa manderang sing·doattokaha.
Myanmar a·songoniko Bangladesh a·song gita guerangko niam gri badingsrukbaengani a·sel Garo Hills-o aro a·dokni pilak biaprangoba da·o gueni damrang komiangenba gue bagan bari dake cha·enggipa bang·en noksan ong·na gita nangtokengachim ine nikna man·a.
Iani bidingo North Garo Hills a·jani saksa dilgipa Panseng B Marak-ba Chief Minister-ko sing·doatengon, gipin a·songoniko niam gri guerangko ra·baengani a·sel Garo Hills-o gue bagan bari dake cha·enggipa manderang neng·nikanirangko chagrongna nangtokenga indiba iani bidingo a·dokni Chief Minister aro NPP-ni dilgiparangba maming ku·rangkon on·tokjaenga ine an·tangni suk ong·gijaniko parakataha.
“Niam gri gipin a·songoniko gue badingsrukbaengani gimin Congress, TMC aro Independent candidate-ba ku·rang on·enga indiba NPP aro NPP-ni minister-rangde iani bidingo jrip dongtokaienga. Chief Minister an·tangan Garo Hills gimikchin re·roroe an·tangni nokgipa Agatha Sangma-na campaign ka·engachim indiba gue bagan dake cha·enggipa manderangni dukni giminde katta mingsakoba janapa dongja,” ine Panseng aganaha.
Panseng-ni aganani gitade, iani bidingo North Garo Hills-o gue bagan dake cha·enggipa manderang, Chief Minister-na sedoatenba, niam gri gue badingsrukaniko champengchina didiatahachim indiba da·alonan uamangna a·dok sorkari maming aganchakaniko on·kujaengachim.
“Uni gimin Garo Hills-o gue bagan bari dake cha·enggipa manderangni namgnina iani bidingo talataniko on·china anga Chief Minister-ko mol·molenga. Na·a (CM) Garo jatna ka·sabebegipa ong·genchimode da·alo gue bagan dake cha·enggipa manderangni namgnina gipin a·songoniko niam gri gue badinganiko dontongatgnokchim,” ine Panseng parakataha.
Panseng-ni u·iatani gitade, Myanmar a·songoniko Bangladesh a·song gita niam gri gue ra·baengani a·selan da·alo gue bag-sani dam gong 2000/-ona tang·onangaha aro gue bagan bari dake cha·enggiparang namen noksan ong·atako man·na nangtokengahachim.
