TURA: East Garo Hills a·jani Rongmil jolo so·ote galako man·gipa manderangara gari aro matchu cha·ugiparangsa ong·ani gimin gari aro matchu cha·ugiparangni gisepo kajia ong·esa ia manderang so·otako man·ahakon ine East Garo Hills a·jani police-rang, an·tangtangni chanchichipenganiko parakataha.
East Garo Hills a·jani SP SA Rynjah-ni u·iatani gitade, bilsi 35 ong·gipa Jamor Ali, uni driver Noor Ahmed aro bilsi 25 ong·gipa Zahidul Islam, re·anggipa April-ni 25 tarikon, Meghalaya a·doko kam nangchongmota dongani gimin re·baenga ine noko aganbaahachim. April-ni 16 tarik pring 6:30 bajimango, uamang Garo Hills-ni buring dakgipa biapo cha ringenga ine Jamor Ali, nokni manderangna phone ka·e aganataha indiba uni ja·mande uamangni phone switched off ong·aiaha aro uamangna uamangni nokni manderang phone ka·oba man·taijaha.
Uamangni gimaenggipa gariko, Rongjeng police station-ni ning·o donggipa Rogu Alda songona dakanggipa ramani buringo, kamgiminkosa ja·mano police-rang man·ahachim. Gari man·gipa biap sambarangoniko police-rang am·sandiangkuon, gopdaldal gopramkoba nikeaha aro ia gopramrangko cho·e nion, ia mande sakgittamni kamgimin manggisirangko police-rang man·aha ine SP u·iataha.
Indake ong·engon, ia mande sakgittamoni saksa Zahidul Islam-de gari cha·uanina Dudhnoi aro Krishnai-o case dongkuengachim aro sakgipin Jamor Ali-ba matchu cha·uana Assam-ni Matia police station-o case dongkuengachim ine East Garo Hills SP parakataha.
“Ia a·selni bidingo am·sandichenge nion, ian gari aro matchu cha·ugiparangni gisepo kajia ong·ani a·selsa ong·aha ine chinga chanchichipenga. Iani bidingo chinga mokordoma ka·enba ning·tubate sandirokanirangko dakengkua,” ine SP parakataha.
