SHILLONG: Da·al April-ni 19 tariko ong·atenggipa Lok Sabha election-ko tom·tome ong·atna man·na gita Meghalaya a·dokni pilak biaprangon chu·onga gita chel·chakanirangko donataha.
Meghalaya a·doko Lok Sabha seat damgni, chong·motan Shillong aro Tura Lok Sabha constituency donga aro a·doko skanggipa changna dingtang dingtang dolrangni bilakbee susagrikaniko nikna man·engachim.
Shillong parliamentary constituency-na chel·chakanirangko donsoenggipani bidingo East Khasi Hills a·jani Superintendent of Police (SP) Rituraj Ravi, talataniko on·angengon, ia Lok Sabha election-na police-rang, Shillong parliamentary constituency-ni ning·o donggipa pilak biaprangon nanga gita chel·chakanirangko donataha ine parakataha.
“Chinga bebera·a ia election name aro tom·tomen matchotanggen,” ine Ravi aganaha.
SP-ni parakatani gitade, strong room-naba police-rang bilaken chel·chakanirangko donatsoaha aro polling station-rangoba manderang maming kenchakani gri dilgipako seokanio bak ra·na man·na gita nanga gitan chel·chakanirangko donatmanaha.
“Dingtang dingtang gadangni polling station-rang gnang aro polling station-ni kri chinga chel·chakanirangko donataha,” ine Ravi aganaha.
Strong room, polling station aro dingtang dingtang biaprango chel·chakanirangko on·na gita ma·mongni dolchet Central Armed Police Force (CAPF)-rangko donatmanaha ineba ua aganaha.
Manderangna ka·donganirangko on·na gita police-rang, dingtang dingtang biaprangona re·jomanirangkoba dakenga.
Lok Sabha election-ni tarikko March-ni 16 tariko Election Commission-ni parakataoni Meghalaya a·doko sakdok manderang, dingtang dingtang biaprango sina gita nangahachim.
Ia manderangni sianio politics-o bak nangeani dongama dongja uko police-rang sandirokengachim.
Re·anggipa March-ni 27 tariko, dingtang dingtang dolrangni CAA-ko jegale jinma re·jomaniko Ichamati-o ong·atani ja·man mande sakgni so·otako man·ahachim aro iani bidingo KSU-ni membor sakgniko police-rang rim·ahachim.
Uni ja·man, Mawlai Mawroh-oba nok rikenggipa mande saksako, mikkang katipgipa manderang so·ote galangahachim.
Budbar salo, Election-na campaign ka·ani bon·kamgipa saloba Assam-ni mande sakgittamko East Garo Hills a·jani Rongmil jolo so·ote galako police-rang man·ahachim.
