TURA: Tura Lok Sabha constituency-ni gital MP-ko seokna gita election-ko ong·atangahaon, ia Tura sear-ko Congress dolni candidate Saleng A Sangma aro TMC-ni candidate Zenith M Sangma sakgnian chena ka·dongenganiko parakataha.
Sukrobar salo, TMC-ni candidate Zenith M Sangma, an·tangni vote-ko on·ani ja·man kobor ra·timgipa manderang baksa agangrikengon, ia election-o manderangni bakrimaniko man·anian TMC-ko chegipa ong·atna dakchakani ong·gen ine parakataha.
“Election-ni result-rangko agansonade man·ja indiba manderangni bakrimaniko nigenchimode, Garo Hills-ni manderang Dr Mukul Sangma-ni dilanion ka·dongkuenga ine nikna man·a. NPP aro dingtang dingtang dolrangoni bang·en TMC-o napaha,” ine Sangma a·kangataha.
Indake ong·engon, Tura Lok Sabha constituency-ni Congress candidate Saleng A Sangma-ba a·doko aro a·song gimiko ong·enggipa obostarangni bidingo manderangna u·iatna man·ahani gimin ia election-o chegipa ong·na ka·dongenga ine parakatskaaha.
“Manderangni bilrangni gimin aro ia sal somoirango ong·enggipa obostarangni gimin chinga manderangna u·iatahani gimin ia election-o chena ka·dongenga. Indita bilsirangna a·songo ong·enggipa obostarangko ma·sie manderang tusiaoni mikrakgenchimode anga ka·donga chinga chegipa ong·telgen,” ine Saleng aganaha.
Ia chang Lok Sabha election-o bang·bea manderang pu·onna gita re·baahani gimin janapatskaengon, manderang dingtanganiko nangnikengani giminsa da·alo bang·bea manderangan dilgipako seokanio bak ra·angtokaha ine Congress candidate aganaha.
Manderangni bang·e pu·onanio bak ra·aniara una cheani chin ong·engama ine sing·skaon, “Isolni skani ong·ode ong·aigen,” ine Saleng aganchakaha.
