SHILLONG: Re·anggipa Sukrobar salo ong·atanggipa Lok Sabha election-o Meghalaya a·dok gimiko pu·onani 76.60 percent gapaha indiba jillarango donggipa Assembly constituency-rangode ia changoba pu·onanirang skango gitan komitaiaha.
A·dokni jillarango donggipa Assembly constituency-rangoni Mawlai Assembly constituency-on pu·onani 75.40 percent ong·e bang·batgipa ong·aiaha. 2019 bilsini Lok Sabha election-ode ia constituency-oba pu·onani 59.32 percent-san ong·aiahachim.
Mawlai Assembly constituency-o gimik sak 50,953 vote-rang donge, a·doko dal·batsranggipa constituency-ba ong·engachim.
Re·anggipa bilsini Assembly election-oba Mawlai constituency-ni manderang, gisiko nange pu·onanio bak ra·anichi Voice of the People’s Party (VPP)-ni candidate-ko chegipa ong·atahachim aro ia changoba ia constituency-ni manderang bang·en bak ra·na gita re·bataiaha.
Mawlai-ni ja·man North Tura constituency-o pu·onani 73.08 percent ong·e gnigipa ong·skaaha aro 2019 bilsini Lok Sabha election-o 72.65 percent man·gipana bang·gija bataha.
South Tura Assembly constituency-ode ia chang pu·onani 2019 bilsiona bate komibatskaaha maina 2019 bilsiode ia constituency-o pu·onani 71.97 percent ong·achim indiba ia changode 69.60 percent-san gapskaaiaha.
Pynthorumkhrah Assembly constituency-oba ia chang pu·onani adita nambataha maina 2019 bilsiode ia constituency-o pu·onani 64.57 percent-san ong·aiachim indiba ia changode 66.65 percent gapskaaha.
Nongthymmai Assembly constituency-oba 2019 bilsio gitan apsanangaiaha maina 2019 bilsio ia constituency-o pu·onani 63.27 ong·achim aro ia changoba 63.31 percent ong·aiaha.
Indake ong·engon, ia bilsini Lok Sabha election-o pu·onanirang, West Shillong constituency-o 62.41 percent, North Shillong-o 59.55 percent aro South Shillong-o 58.36 percent-san gapskaaiaha.
