SHILLONG: Mongolbar pringwalni 2:30 bajimango, Jowai-ni Salinity Colony-o donggipa Police Reserve-o gari bolgniko, ma·sina man·gijagipa manderang so·e galangaha.
Wa·al so·chipanio police saksani gypsy gari, bon·pile kamchipako man·aha indiba police department-ni bus garikode chu·gimik kamskajaha.
Da·o dipet ia a·selni bidingo tale ma·sikujaengoba, ia garirangko petrol bomarangchi godapangakon ine police-rang chanchichipenga.
Adita salrangna skangsan, a·dokni Deputy Chief Minister Sniawbhalang Dhar-ni Nongmynsong-o donggipa nokko ma·sina man·gijagipa manderang petrol bomachi godapahachim indiba petrol bomako godapanio maming gam-jinrang nosto ong·atako ba manderang saknaanirangko man·jahachim.
Iana skang, NEEPCO (Personnel)-ni Director Maj Gen (Retd) RK Jha-ko dilangenggipa police-rangni gari bolsako ma·sina man·gijagipa manderang, Madanriting police station-ni ning·o donggipa Demthring-o petrol bomachi godapahachim.
Ichamati aro Mawlai Mawroh-o mande so·otanina police-rang, Khasi Students Union (KSU)-ni adita sak membor-rangko potchipenba rim·ahachim aro iani bidingo KSU-ni membor-rang, jingjengatna gita ka·mikkenataniko on·angahachim ine nikna man·a.
