TURA: South Garo Hills a·jani Chokpot Budugre songo niam gri chalaienggipa quarry-oniko sriksrik ro·ong salenga ine koborrangko man·soani ja·man Chokpot jolo donggipa dingtang dingtang dolrang, Chokpot-oni Baghmara-ona re·gipa rama gita niam gri ro·ong salangenggipa dumper truck gari bolgittamko rim·na man·aha ine u·iataha.
Garo Students Union (GSU) Chokpot regional unit-ni general secretary Spensar R Sangma-ni u·iatani gitade, ia truck bolgittamko rim·ani ja·man, ro·ong salna gita lekka pancharang dongama dongja ine sing·sandion, garini driver-rang, ro·ong salani lekka pancharangko mesokna man·jaha aro Chokpot police station-ni officer-in-charge (OC)-sa ro·ong salna rai on·aha ine GSU-ni membor-rangna aganskaaha.
“Iani bidingo chinga Chokpot police station-ni OC-ko April-ni 30 tariko gronge sing·sandion, ua ro·ong salna maming rai on·a dongja indiba ro·ong quarry-ni nokgipa Rakesh, jean Alpha D Marak-ni segipa ong·achim aro uni jakrikja Dipur Ch Sangma-sa dal·dalgipa manderang baksa ripeng dake, OC-ona lekka pancha mamingkon sokatgija, phone gita golpoe da·o ukosa ro·ong bikotna aro salna rai on·aha ine tol·skaaha,” ine GSU Chokpot regional unit-ni president parakataha.
NGO-rangni parakatani gitade, niam gri ro·ong salanina rim·ako man·gipa garini nombor-rangara, AS-01NC 7338, AS-01KC 9096 aro AS-16AC 3556 ong·a aro ia garirangni kosako uamang, IPC-ni section 468/34-o pangchake mokordoma ka·aha.
Mikkangchiba Chokpot jolo donggipa gam-jinrangko aro chiring chibisikrangko nosto ka·na chol ra·enggipa manderangko uamang bilaken warachakangkugen ineba Chokpot jolni nangrimgimin NGO-rang parakataha.
