SHILLONG: Meghalaya a·doko an·seng baljokani kamrangko namdapatna gita dongsoenggipa doctor-rangkon nangani kri jakkalna nangenga ine Health Services-ni Director (MCH&FW) Dr FV Kharshiing parakataha.
Meghalaya Medical Services Association (MMSA)-ni salgnina ong·atanggipa scientific conference aro general body meeting-o jinmana aganprakangengon, a·doko doctor-rang aro sanna banani kamrangko ka·enggipa manderangni chu·onggijanian mongsonggipa ra·biani ong·enga ine Dr Kharshiing parakataha.
“An·chingo ra·bianirang bang·en donga aro apsan daken mikkangchiba iandakgipa ra·bianirangko chagrongna siengkua. Apsan bakrime kamrangko ka·anichisa an·ching pilak gadangon chu·sokaniko ra·bana man·gen. Uni gimin an·ching je cholrang donga, ua cholrangchin kamrangko nambatatna gita nangenga,” ine Dr Kharshiing aganaha.
An·seng baljokani kamrangko ka·anio a·gilsakni gita apsan gadango ong·na nangenga aro an·tangtangan gital kamrangko ma·sie ra·na nangenga ineba ua aganaha.
COVID-19 sajinmako chagronganian mikaoatani gita ong·aha ine janapatengon, ia sajinma sokbaani ja·mansa a·doko chu·onggijanirangko ma·sina man·aha aro ian kamrangko nambatatna gita sakantikon de·mesaani gita ong·aha ine Health Services-ni Director parakataha.
Skangode nambata sanna bananirangko on·na gita simsakani komiachim ine janapatskaengon, ia sal somoirango manderang, sanna banana korosrangna simsakbatahani gimin sagiparangna dangdike on·anikoba nambatatna gita nangchongmotaha ine Dr Kharshiing aganaha.
“Iandakgipa kamrangchisa sanna banani kamrangko ka·enggipa manderang, manderangni ka·donganiko man·skagen,” ine ua aganaha.
