SHILLONG: Meghalaya a·doko drugs ba pekatgipa samrangko jakkalani aro badingsrukanirangko champenganio kamrang olgrokkuenga ine a·dokni Social Welfare Minister Paul Lyngdoh aganenba, iandakgipa kamrangko champenganio niamrangko bilakbate jakkalna nangenga ine parakataha.
“Niamrangko ja·rikanio an·ching kamrangko nambatatna nangkuenga ine anga ku·rachakenga. Police department-o da·o chinga gital recruitment-ko matchotatani ja·mansa ia kamrangko Anti Narcotic Task Force (ANTF) nambatatna ja·ku de·anggen,” ine Lyngdoh aganaha.
Shillong songjinmani ramarango drugs badingani video-rangko baditaba chang manderang niksona man·ahani gimin Social Welfare Minister, ia kattarangko aganaha.
A·doko drugs jakkalani aro badingsrukanirangko champengatani gimin janapatengon, “Pekatgipa sam jakkalani aro badingsrukaniko champengatanio chinga songsalni manderangkoba bak ong·atna sienga,” ine Lyngdoh aganaha.
“Chinga dingtang dingtang gittimrango songdongenggipa manderang baksa iani bidingo agangrikna man·aha. Na·simang chuef minister-ni ong·atgipa tom·aniko gisik ra·enggen, jeon chinga dingtang dingtang toromni dilgiparangko aro skul-college-ni dilgiparangkoba okamataha,” ine ua aganaha.
Mawlai-ode uamang kamrangko a·bachengatna man·engaha ine janapatskaengon, “Mawlai Town Dorbar, chingna a·arangko on·aha aro ia a·arangon chinga drug addict-rangko namatpilna gita counseling centre-rangko rikgen,” ine Social Welfare Minister parakataha.
Ian salsa salgnini gisepo matchotatna man·gipa kam ong·ja ine talataniko on·angskaengon, Meghalaya a·dokara Myanmar-oni sepangani gimin re·ruragipa manderang, altuaen pekatgipa samrangko ra·napbana man·enga ine Lyngdoh parakataha.
