TURA: Garo Hills-o mongsonggipa chiringrangoni dilsa Ganol chibisik sambarango a·ba o·e cha·engani a·sel Ganol chiring tiproroangengahani gimin ia chibisik samba jolrango a·ba o·e cha·aniko champengna gita Mongolbar salo Nokma Council-ni membor-rang, a·dokni Chief Minister Conrad K Sangma baksa tom·e chanchirimangaha.
Ganol chibisiko a·ba o·e cha·aniko champengna chanchirimangengon, Ganol chibisik samba jolrango songdongenggipa manderang, a·ba o·e cha·anirangko dontongna man·na gita sorkari, songni nokni manderangna dingtang janggi tangani cholrangko on·skagen ine ia tom·anio a·dokni Chief Minister Conrad Sangma, Nokma Council-na ku·rachakaniko on·ataha.
Garo Hills-o chiring chibisikrang tiproroangengahani a·sel manderang chirangko man·jae neng·nikanirangko chagrongna nangtokengahani gimin chiring chibisikrangko ripingna gita a·dok sorkari, songni Nokma Sanerang baksa nangrime kamrangko ka·anggen ineba Chief Minister, Nokma Council-na ku·rachakaniko on·ataha.
Garo Hills-ni chiring chibisikrangko ripinge rakkina gita Garo Hills Autonomous District Council (GHADC)-ni dilgiparang aro Nokma Council-ni membor-rang baksa re·baenggipa May 15 tariko Shillong-o apsan tom·e chanchirimangtaigen ineba ia tom·anio Chief Minister parakataha.
“Chief Minister-ni okamataniko man·e chinga Nokma Council-ni membor-rang, Walbakgre-o donggipa CM-ni nokona re·angenba maikai Ganolma aro Ganolsa-ni chibisikrango a·ba o·e cha·anirangko champengna man·gen, iarangni bidingo unbaksa chanchirimangaha aro songni nokni manderangna a·dok sorkari, dingtang janggi tangani cholrangko on·skae, a·ba o·e cha·anirangko champengna apsan kamrangko ka·angna ine Chief Minister, chingna ku·rachakaniko on·atahani gimin chinga Chief Minister-ko mittelpilna ska,” ine Chief Minister-ko grongeani ja·man Nokma Council-ni dilgiparang parakataha.
