SHILLONG: Batanggimin salrango, Shillong songjinmani dingtang dingtang biaprango police aro sorkarini garirangko petrol bomarangchi godapanio jak donggipa manderangko da·onan police-rang rim·na man·kujaenga.
Batanggimin antirango, Shillong songjinmani dingtang dingtang biaprango, sorkarini garirangko so·chipe galna jotton ka·anirangko aro police station-rang baksana sorkari nokrangko ma·sina man·gijagipa manderangni petrol bomarangchi godapanirangko bang·en nikna man·ahachim.
Iani bidingo kobor ra·timgiparangna talataniko on·angengon, a·doko ong·a obostarangko district administration mikrakbate nirok sandienga aro dingtang dingtang biaprango walni somoirango nirikkianirangkoba bilakbatataha ine East Khasi Hills a·jani Deputy Commissioner SC Sadhu parakataha.
Banoba iandake ong·gija dakanirangko ba chanchichipanirang donggenchimode ta·raken police-rangna u·iatchina gitaba re·anggipa antiosan District Administration, manderangko didiatahachim.
“Iandakgipa kamrangko ka·anio jak donggipa manderangko chinga rim·na man·telaigen,” ine Sadhu aganaha.
Deputy Commissioner-ni parakatani gitade, a·doko dongsogimin sipai dolrangko dingtang dingtang biaprango chel·chakna donatmanahani gimin da·o dipet sipai dolrangkoba rimbadapkujaenga aro police-rang, walni 9:00 bajini ja·man manderangni re·ruraanirangkoba name nirikkienga.
Adita salrangna skangsan, Water Resources Directorate-ni ML-01A 0175 gariko ma·sina man·gijagipa manderang so·chipangahachim aro una skang, Rynjah police station aro Sadar police station baksana Shillong songjinmao donggipa MGCC-ni office nokkoba petrol bomarangchi godapahachim.
