SHILLONG: Umiam Dam-ko taridapanio adita dingtangatna nanganirang dongahani gimin sorkari, somoiko July jaona ra·dodapnaba gnang.
Iani bidingo kobor ra·timgiparangna talataniko on·angengon, Umiam Dam-ko taridapanio dakchakanirangko on·china gita a·dok sorkari, IIT Guwahati-ko mol·molataha ine Sombar salo, a·dokni Power Minister AT Mondal parakataha.
Mondal-ni parakatani gitade, ia damni kosakko bitumen-chi tarigenma ma dingtang dake tarigenma uni bidingo IIT Guwahati-o sing·sandie ra·aha aro IIT Guwahati-ni ku·pattianio pangchake sorkari, ia damni kosakko dingtange tarina tik ka·aha.
Da·o Umiam Dam-ko taridapanio kamrangko dingtangatna nangengahani gimin kamrangko July jaona ra·doatna nangnaba dongaha ine Power Minister parakataha.
Ia dam-ko re·anggipa December-January jarangonin tarina a·bachengahachim aro ia dam-ko taridapengani a·selan ia rama gita re·ruraenggipa gari gorarang apchangket ong·e manderang neng·nikanirangko chagrongna nangtokengahachim.
“Chinga ma·sia manderang neng·nikanirangko chagrongna nangtokenga indiba ian manderangni namgninasa ong·engani gimin an·ching pilakan chakchikna nangaigen,” ine Mondal aganaha.
Ia kamko matchotahaode Umiam Dam-ni tangbangani bilsi 20-mang bakrodapgnok ineba Power Minister aganaha.
