TURA: Williamnagar-ni Greater Water Supply Scheme-ni bidingo RTI ka·anina maming aganchakanirangko on·jahani gimin PHE department-ni kosako East Garo Hills a·jani Deputy Commissioner-na badi ka·doangahaoba maming ja·kurangko de·jahani Deputy Commissioner-ni kosako Williamnagar-ni saksa social activist Nilberth Marak, Chief Information Commissioner (CIC)-na badi ka·doangskaaha.
CIC-na badi ka·doanggipa chittio Marak-ni parakatani gitade, gong kror 121 ong·gipa Williamnagar Water Supply Scheme-ni bidingo ua 2023 bilsini September 12 tarikon RTI ka·e sing·sandiatahachim indiba PHE department-ni Public Information Officer (PIO), ia scheme-ni tender notice-rang uni office-o dongja aro tender-ko Chief Engineer-ni office-onisa ka·aha ine pa·sikenba talatanirangko on·na jechakaiahachim.
“PIO-ni aganchakaniko anga October-ni 4 tariko man·soani ja·man iani bidingo anga October-ni 10 tariko East Garo Hills-ni Deputy Commissioner-na badi ka·e sedoatskaahachim indiba da·o jadok ong·pilengahaoba ua mamingkoba aganchakkuja aro maming ja·kurangkoba de·a dongkuja. Uni gimin PHE-ni PIO aro Deputy Commissioner-ba angni RTI ka·gipana maming ja·kurangko de·jahani gimin anga CIC-na badi ka·dona nangaon ga·akaha,” ine Marak parakataha.
