TURA: Consumer Affairs, Food & Distribution Ministry, Food & Public Distribution Department-ni ge·etanio pangchake NFSA-ni ning·o e-PoS device gita an·tangtangni man·na nangenggipa bosturangko ra·na Aadhar-ko nangchongmotenga ine West Garo Hills a·jani Deputy Director (Supply) u·iataha.
Iani bidingo, Aadhar-na biming segataniko ia 2024 bilsini June 30 tarikona ra·dodapatahani gimin NFSA-ni namgnirangko man·enggipa pilak manderangkon, an·tangtangni sepangbatgipa Aadhar enrolment centre-rangona re·ange ba DC (Supply) Tura-ni ong·atenggipa awareness program aro Aadhar enrolment drive-rango bimingtangtangko segatchina gitaba u·iataha.
Uni gimin NFSA-ni namgnirangko man·enggipa pilak manderangkon, an·tangtangni Aadhar Card-rangko NFSA Ration Card baksa meliatna Tura-ni Deputy Commissioner (Supply)-ni office-ona watatskana man·na gita an·tangtangni Aadhar card-rangko fair price shop dealer-rangna on·echina u·iataha.
Iani bidingo Fair Price shop dealer-rangna ge·etaniko on·china aro NFSA-ni namgniko man·enggipa manderang an·tangtangni Aadhar card-rangko sokatna man·na gita niroke kamrangko ka·skachina gitaba ua Supply-ni sub-inspector-rangko ge·etangskaaha.
