Nongpoh: Ri Bhoi District-ni Umdihar Presbyterian Church ba gilja nokko Sukrobar walo u·ina man·gijagipa cha·ugiparang siltong ra·bitgipachi dokdrakenba chimonge dongimin tangkarang aro gipin gamchatgipa bosturangko cha·uangaha.
Presbyterian Church Umdihar-ni saksa budepa RB Shadap-ni aganani gita, iandakgipa obosta skang changrangoba ong·aha, ian skanggipa changna iandakgipa obostako chagronga ine ong·ja. Iana skangba apsan dakgipa obosta changgittam changbri ong·engjok. Ia changde cha·ugiparang iron rod ba siltongko jakkale kelki gita napaha.
Gilja nokningona napaon cha·ugiparang tala teke dongipa almirah-ko dokdrakaha, gilja re·ronggiparangni dan on·ako chimonge dongipa tangkarangko ra·aha. Una agreba musical instrument ba doka dam·ani bosturang aro pul dongipa vase-rangko ra·angaha. Cha·giparangni ia kamko nike, church community, bilongen duk ong·aha, maina uamang toromni kamna jakkalgipa chalice-koba ra·angaha.
Iana skang cha·uani obostako church, parakgija donahachim. Indiba ia changde church dilgiparang jrip dongna sikjaha aro cha·uani obostako parakataha. Uandake church-ni memborrang ia obostana bilongen duk ong·ah mongsongbate me·chikrang uamangni neng·e kam ka·e giljana on·gipa bosturangko cha·uangani gimin graptokaha.
Ia mamlao name dake chanchibewalani ja·man church dilgiparang, ia mamlako Umdihar-ni Dorbar Shnong-na pakwataha. Indake jolni authority-ko ia mamlako nirokatchina mol·molataha aro dos dakgipako sandie uni kosako ja·ku de·na dabiaha.
