SHILLONG: Ri Bhoi a·jao gital rikgipa State Zoo-ona Phan Nonglait Park ba jekon Lady Hydari Park ineba mingachim, ia biapo donenggipa matburingrangko June jao apjitangna gita a·dok sorkari manchienga.
Mingsinggipa Lady Hydari Park-ko 2023 bilsio Ka Phan Nonglait Park ine mingsreskaahachim.
Ia park-o donenggipa matburingrangko gital rikgipa State Zoo-ona apjitatani bidingo janapatengon, “Chinga ia park-o donenggipa matburingrangko State Zoo-ona apjitangna kamrangko ka·engaha aro June jaode chinga matburingrangoni bang·batakon gital rikgipa State Zoo-ona apjitangna ka·dongenga,” ine a·dokni Chief Minister Conrad K Sangma parakataha.
Ia biapo donenggipa matburingrangko gital rikgipa State Zoo-ona apjitangahaode ia park-ko gital dake sorkari taridapskagnok ineba Chief Minister parakataha.
“Matburingrangko apjitangahaon chinga ia park-o dingtang dingtang biaprangko on·e taridapgnok. Ia park-ni mitam bakrangkode chinga songjinmao garirangni apchangket ong·aniko komiatna gita parking lot dakena tariskana miksongenga. Kamrangko bakan a·bachenggnok,” ine Sangma aganaha.
Chief Minister-ni aganani gitade, ia park-ni mitam biaprangko civil hospital-naba jakkalanggen.
“Chinga biaprangko niangaha aro Shillong Civil Hospital-koba dal·batatna gita chinga ia biapni mitam biaprangko hospital-na jakkalna miksongenga. Ia biapko taridapanichi Shillong songjinmani apchangket ong·aniko bewalde komiatna man·gen,” ine ua aganaha.
Ia State Zoo-ko Ri Bhoi a·jani Umtrew-o donggipa hectare 72 a·arango, gong kror 35 korosrangchi rikahachim ine nikna man·a.
Ia zoo-ko rikani skanggipa bako, rokom 15 matburingrangko donchakani, Visitor’s Plaza, Cafeteria, Veterinary Clinic, Feed Store, Main Gate aro gipin kamrangkoba man·chapachim.
Ia zoo-ko matchotahaode, matchok, peru, se·el, makbil, matcha, matchapeng, huro, makkre aro uandakgipa ma·manti matburingrangko ia zoo-ona ra·bagnok ineba official-rang u·iatahachim.
