TURA: Garo Hills-ni Tribal bading chiwalgiparang, Garo Hills Autonomous District Council (GHADC)-na an·tangtangni bosturangni kajinarangko gamani ja·manoba bazar-ko ra·enggipa mitam manderang, ia bading chiwalgiparangoniko kajina gile ra·kuengani gimin Tura-ni MDC aro BJP-ni state vice president Bernard N Marak sing·doataha.
“Garo Hills-ni Tribal bading chiwalgiparang, GHADC-ni ning·o bazaar ra·gipa mitam manderangna niam gri kajinarangko gamdapna nangenga. Garo Hills-ni bang·bata bazaar antirangon iandake Tribal bading chiwalgiparang, changgni dake kajinarangko gamna nangengani a·sel noksan ong·na nangtokenga,” ine Marak parakataha.
Marak-ni parakatani gitade, GHADC-ni ning·o donggipa bazaar damsao, bading chiwalgiparang an·tangtangni bosturangna GHADC-na kajinarangko gamani ja·manoba ia bazaar-ko ra·gipa manderangna changbonga bate kajinarangko gamna nangkuengachim.
“Antini salrango gipin biaprangoni bazaar-ona ra·bagipa bostuni kajinarangko gilna gitasa GHADC, Garo Hills-ni bazaar-rangko dingtang dingtang manderangna on·enga indiba mitam manderang ia licence-ko ong·gija dake jakkalenba, ramarango bading chiwale cha·enggipa manderangonikoba niam gri kajina gile ra·skaenga,” ine Tura MDC parakataha.
Ramasamrangode bazaar ra·gipa manderang kajinarangko gilna gita niam dongja ine talataniko on·angengon, an·tangtangni bosturangko gipin biaprangona watatna skangan bag-prako gong 10 ka·e kajinarangko gamanahani gimin iandakgipa bading chiwalgiparangnade GHADC-an clearance certificate-rangko on·manaha ine Marak parakataha.
“Mitam bazaar ra·gipa manderang, bading chiwalgiparangoniko bag-prakon gong 50 ka·e kajinako gilenga aro ian ainni a·palo ong·enga. Mikkangchi iandakgipa kamrangna FIR-ko ka·gen. Je manderangan iandake niamni a·palo kajinarangko gilengachim, uandakgipa lessee-rangni licence-ko GHADC den·galpilna nanga,” ine Marak parakataha.
