Tura: Meghalaya-na, First Year Undergraduate Programs (FYUP)-na university-rango Common University Entrance Test (CUET) griba admission-rangko ra·na on·china gita dolsa Social organization, Achik Conscious Holistically Integrated Krima (ACHIK) dabiaha.
Indiao, central university-rango admission ra·na gita CUET-ko University Grants Commission (UGC)-ni nangchongmotgipa dakatani gimin ACHIK, iako dabiaha.
“Ia CUET-ko nangchongmotgipa dakataniara, regional aro socio-economic-ko minggijani gita ong·a. Iako ra·gataniara, education-o ja·manchakaniko apalbatatgen. CUET-ko nangchongmotgipa dakataniara lekka-porana peng·changaniko ra·bagen, cholgukade ong·jawa. Ian dal·ang-chuangnagipa chatro-chatrirangna, uamangni nikjuamanganiko chu·sokatna re·mikkanganio ja·donggaataniko ra·bagen” ine NGO parakaha.
Uamangni chanchiani gitade, CUET-ara rimnapani pal changalani ostro gitasa ong·gen aro iachin chu·sokangna aro teng·sunasigipa chatro-chatrirangni chol man·gniko cha·sotgen.
Indake ong·engon, Common University Entrance Test (CUET)-o pangchake admission-ko on·ana batede uamangni Board porikka result-rangko pangchakesa admission-ko on·china gitaba NGO dabiaha.
“Board porikkarangan chatro-chatrirangni knowledge ba u·i-ma·sianirangko aro changa-sapanirangko nina nambatgipa ong·a, jeon CUET-de ge·sa porikkasan mandeni dingtangani aro bilakaniko ninade choligipa ong·ja” ine uamangni koboro janapaha aro Board porikkaan chatro-chatrirangko chekna ba nina nambatgipa ong·aia ineba uamangni chanchianiko parakataha.
Songadam-nokadamni aro kangal cholgri-apgri nokdangni bang·a chatro-chatrirang CUET-na coaching ra·na aro cholrangko ra·na neng·nikanirangko man·gen aro iachin uamangni tang·dobagniko cha·sotgen ineba ACHIK mesoke aganaha.
