Tura: Tura-ni saksa bilsi 52 ong·gipa mande, Sisil Sangma-ko mijal attamchibarao auna re·angao Pelga Dare (Waterfall) jroe romitingo sripe siahakon ine chanchichipenga.
Pelga Dare, ia damsa mingsinggipa biap ong·a, jeon mande siani koborrangba nakatsima gita dakaia. Ia Dareara chi nam·en tu·a aro namen rong·grimraragipa ong·a.
Police-ni koboro gita, ia a·sel mijal attamchibara ong·aha, je a·selni bidingon jolni manderang police-na u·iatahachim.
Sisil, New Walbakgre, Dakopgre, Tura-ni ong·achim, jeni manggisikon joltangni manderang man·aha.
“A·selrangko sandina gita staff-ko watataha aro manggisiko porikka ka·e nina gita Tura Civil Hospital-ona ra·angaha” ine superintendent of police, WGH, Dara Aswaghosh aganaha.
