‘Remal’ balminduri balanichi SWGH a·jani dam 21 songrang nangchakeako man·a

AMPATI: Sombar wal dipet Garo Hills-oba ‘Remal’ balminduri balanganichi South West Garo Hills a·jao komibeoba dam 21 songrang, bilongbee nangchakeaniko man·e manderangni nok-jamrang, bagan barirang aro gam-jinrang nosto ka·ako man·angaha.
South West Garo Hills a·jani Betasing C&RD Block ning·o komibeoba dambonga songrang bilongbate nangchakeako man·aha aro ia songrangara, Rongsang Songma, Chondonpara, Dalbotpara, Purasinga, aro Betasing Khongpara songrang ong·a. Rerapara C&RD Block-ni ning·o dam 12 songrang nangchakeako man·batskaaha aro ia songrangara, Balalgre, Chigitchakgre, Jaluapara, Lower Damalgre, Lower Damalgre B, Chengjora, Abiselagre, Balnanggre, Gongglanggre, aro Bolganggre songrang ong·a. Zikzak C&RD Block-ni ning·o komibeoba damgittam songrang bilongbate nangchakeaniko man·angskaaha aro ia songrangara, Chapahati-I, Chapahati-II aro Kalaipara songrang ong·a. Purakhasia C&RD Block-ni ning·o song damsa bilongbate nangchakeaniko man·angskaaha ine kobor on·aha.
Koborko on·ani gitade, South West Garo Hills a·jao ‘Remal’ balminduri balanichi komibeoba sak 377 manderang nangchakeanirangko man·na nangaha, nok te·gittim chu·gimik nosto ka·ako man·aha aro nok te 55-de adita nosto ka·ako man·angskaaha.
Balminduri balanio bolrangba pangpikatako man·e Ampati, Kalaichar aro gipin ramarang adita champengatako man·angaha. Indake ong·genchimoba, PWD-ni manderang, ramarango be·e donggipa bolrangko gale, gari gorarangko watpilna man·aha.
Je nokdangrangan an·tangtangni nok-jamrangko gimaatna nangahachim, uandakgipa manderangni bank account-rangona tangka paisarangko chipatna da·o kamrangko ka·enga aro iani bidingo pilak block development officer (BDO)-rangko, salgittamni gisepon, block-tangtango nosto ka·a man·ani report-rangko on·china sorkari ge·etangaha.
Balminduri balanio, South West Garo Hills a·jani bang·a biaprangon bijoli krongrang, substation-rang aro bijoli line-rangkoba nosto ka·ako man·angaha aro uandaken a·ja gimikon bijoli sina gita nangaha. Bijoliko ta·raken on·pilna gita MeECL-ni manderang rakbee kamrangko ka·enga ineba kobor on·aha.
South West Garo Hills a·jao balminduri balanganichi neng·nikanirangko man·enggipa manderangna ta·raken dakchakanirangko on·na kamrangko ka·engaha ineba District Administration, ku·rachakaniko on·ataha.