BAGHMARA: South Garo Hills a·jani Karukol dolong gita dal·dalgipa garirang, jekai bus, truck aro uandakgipa garirangni re·ruraengani a·sel ian ia dolongnasan ong·aigija re·ruraenggipa manderangnaba kenchakna nanganiko ra·baenga ine South Garo Hills a·jani Deputy Commissioner parakatenba, ia Karukol dolong gita dal·dalgipa garirangni re·ruraaniko champengataha.
Karukol dolong gita metric ton 9-na bate jregipa garirang re·na man·jawa ine u·iatengon, dal·dalgipa garirang pilakkon gipin rama gita re·skachina South Garo Hills a·jani Deputy Commissioner didiataha. Ia dolong gita dal·dalgipa garirang re·rurana man·jana gita ia dolong sambao dingtangmancha seachi sign board-rangko donchina gitaba Deputy Commissioner, nangchakegipa department-rangna ge·etaniko on·ataha.
Ia dolong gita dal·dalgipa garirangni re·ruraanirangko nirikkichina police-rangko didiatengon, ia niamko manigijagipa manderangna dongimin niamrango pangchake sastiko on·gen ine Deputy Commissioner mikrakataniko on·ataha.
Ia dolong gita re·ruraenggipa manderangni naljokgnina ia dolongko nirokjringchina gitaba ua Baghmara-ni PWD (NH) Division-ko didiataha.
