SHILLONG: Meghalaya a·dokni chatro chatrirang, mongsongbate songadam nokadamrango, Common University Entrance Test (CUET) porikkako seanio neng·nikanirangko chagrongna nangtokengani gimin chatro chatrirangna Class 12-ni result-o pangchakesa college-rango admission-ko on·china Voice of the People’s Party (VPP) dabiangaha.
Iani bidingo VPP-ni dilgiparang, a·dokni Education Minister Rakkam A Sangma-ko grongenba, a·dokni chatro chatrirangna CUET-ko ra·gija, Class 12-ni result aro mark-rango pangchakesa college-rango admission-ko on·china didiangaha.
VPP media cell-ni membor Rusievan Shangpliang-ni aganani gitade, adita salrangna skang Shillong-ni CUET centre damsao porikkako segipa chatro chatrirang neng·nikanirangko chagrongna nangtokahani gimin da·o chatro chatrirang aro uamangni ma·a paarangba CUET-o ka·dongchakna man·tokjaengaha aro a·dok sorkariba uamangni neng·nikanirangko chel·chakna maming ja·kurangko de·kujaengachim.
Indake ong·engon, CUET-ko serikna man·gijagipa aro serikna man·ahaoba neng·nikanirangko chagrongna nanggipa pilak chatro chatrirang namgninan Class 12 porikkani mark-rango pangchake college-rango admission-ko on·china uamang a·dokni Education Minister-ko didiangaha ine Shangpliang parakataha.
Iani bidingo a·dokni Education Minister niatna gita ku·rachakaniko on·ataha ineba VPP-ni dilgipa parakataha.
Meghalaya a·doko skanggipa changna CUET-ko ra·anio bang·a chatro chatrirangan serikna gita chol ong·jaha aro mitamrangara porikkako seanio neng·nikanirangko chagrongna nangtokaha ine matnangatenba, Meghalaya a·dokkode CUET-oniko watsrangchina gita dingtang dingtang NGO-rangba dabitokengachim ine nikna man·a.
CUET porikkani result-ko June 30 tariko parakna siengahachim.
