SHILLONG: Meghalaya a·dok gita Tripura, Mizoram, Manipur aro Assam-ni mitam bakrangona re·gipa National Highway (NH-6) ramako watpiltaiaha ine Budbar salo official-rang parakataha.
Salgro salaramni dambri a·dokrangko a·songni gipin bakrang baksa nangdimeatgipa NH-6 ramao a·arang be·rongani a·sel da·o gita wachini somoirangode ia rama gita re·ruragipa manderang neng·nikanirangko chagrongna nangrongachim.
Wachini somoirangode East Jaintia Hills a·jani km 30-mang bakrogipa NH-6 ramao pangna bilsian a·arang be·e ramarang champengatako man·rongachim.
Official-rangni parakatani gitade, Mongolbar salo, Sonapur jolo ro·ongrang aro a·arang rurongenba ia rama gita gari gorarangni re·ruraanirangko champengatahachim indiba ia ramao a·dubek dakaniko rongtalatna gita district administration, kam ka·giparangko jakkalaha.
“A·a be·ronggipa biapo chinga gari gorarangko watpilna man·aha aro garirang da·o rama paksamsa gitade re·tokengaha. Bakan chinga chu·gimik ramako watpilna ka·dongenga,” ine East Jaintia Hills a·jani Deputy Commissioner Abhilash Baranwal, kobor ra·timgiparangna aganaha.
Indake ong·genchimoba, ia rama gita songre-songgabatengon, an·tangtangna simsakchina aro chu·onga gita cha·ani ringanirangko ra·bitchina gita DC, ia rama gita re·ruraenggiparangko didiataha.
“Ia km 30 ong·gipa ramao wachini somoiode je somoioba a·arang rurongbae ramarangko champengatna man·aia. Indake ong·genchimoba iandakgipa somoirangona chinga chu·onga gita kam ka·giparangko tarie donaha,” ine Baranwal aganaha.
