Bilsi 6-na skang nokdonggagipa Farmers Market-ko SWGH-o kulie on·anga

AMPATI: South West Garo Hills a·jao bilsidokna skang nokdonggae on·gipa Integrated Farmers’ Market-ko Sukrobar salo, Ampati Bazar-o kulie on·angaha.
Ia Integrated Farmers Market-ko Garo Hills Autonomous District Council (GHADC)-ni Chief Executive Membor (CEM) Albinush Marak kulie on·angaha aro ia farmers market-ko kulie on·anganio, GHADC-ni EM Stevie Marak, Dalu-ni MDC Pramod Koch, Betasing-ni MDC Balsrang Sangma, SWGH District Horticulture Office-ni Assistant Director (Marketing) Balsrang Sangma, Horticulture aro GHADC-ni official-rang, Ampati Bazar Committee-ni membor-rang, game ge·e cha·giparang aro bading chiwale cha·giparangba dongpae bak ra·angtokaha.
Ia Integrated Farmers Market-ko kulie on·anganio GHADC-ni CEM, jinmana aganprakangengon, game ge·e cha·giparangni namgnina ia farmers market-ko kulie on·na man·ahani gimin an·tangni kusi ong·aniko parakangenba, ia farmers market-ko matchotatanio dingtang dingtang neng·nikanirangko chagrongna nangahani a·sel kuliningna man·jaha ine talate on·angaha.
Ia farmers market-ko kulianichi songo noko game ge·e cha·enggipa manderang, gipin biaprangona re·angna nanggija ia biapon an·tangtangni game ge·e man·gipa bosturangko palna sim·na man·gnok ineba Marak aganaha.
Ia market-o dokkan dakna gita dorgastorangko galchina game ge·e cha·giparangko didiangengon, ia farmers market-ko an·tangtangni namgnina name jakkalangchina aro an·tangtangni gama ge·anirangkoba namdapatchina GHADC-ni CEM ku·pattiangaha.
Ia tom·anio Dalu-ni MDC Pramod Koch-ba jinmana aganprakengon, pangkamgipa gama ge·anirangko dakna, ong·telaigipa a·salrangchi gama ge·anirangko dakna aro chirangko ripinge rakkina nangengani gimin aganangaha.
Ia Farmers Market-ko rikna gita 2013 bilsini May 30 tariko Memorandum of Understanding (MoU)-o soi ka·grikenba, ia market-ko rikna gita 2018 bilsini March 31 tariko GHADC-na pakwate on·angahachim.
Ia tom·anio, SWGH District Horticulture Office-ni Assistant Director (Marketing) Balsrang Sangma, game ge·e cha·giparangoni saksa Salbinson Sangma aro gipinrangba aganprakangaha.