TURA: Adita salrangna skang, South West Khasi Hills a·jani song damsao bilsi sokkugijagipa me·chik bi·sa sakbriko songgipinni adita sak manderang tol·e okamatenba drae til·ekaha ine kobor on·ani ja·man, dos dakgipa manderangko rim·enba rakbatsranggipa sastiko on·china A·chik Holistic Awakening Movement (AHAM) Rongjeng regional unit-ba dabiangaha.
Koborko on·ani gitade, ia me·chik bi·sa sakbriara bilsi 13 aro bilsi 14 ong·gipa me·chik bi·sarangsan ong·aiachim aro uamangko uamangni ripeng dakmikgipa manderang sambao donggipa songona okamatani ja·man sak 12 manderang drae til·ekahachim. Ia me·chik bi·sarang Sukrobar salo, ua songona re·angahachim aro Robibar salosa noktangtangona sokbapilahachim.
Ia a·sel ong·ani Sukrobar attamni 7:00 bajimango ong·ahachim.
Ia me·chik bi·sa sakbriko, uamangni ma·drangrang sandiangenba Robibar salosa man·eaha aro iani ja·man me·chik bi·sa sakbrini ma·drangrang, dos dakgipa manderangni kosako FIR ka·doangaha.
Indake ong·engon, iandake me·chik bi·sarangko kragija dake kal·akanina AHAM Rongjeng regional unit-ba suk ong·gijaniko parakatengon, dos dakgipa manderangko ta·raken rim·china aro rakbatsranggipa sastirangko on·china dabiangaha.
Ia me·chik bi·sa sakbrina kakket bichalko man·e on·na gita dabidilenggipa South West Khasi Hills a·jani dingtang dingtang NGO-rangnaba AHAM Rongjeng regional unit chakpaaniko parakataha.
