SHILLONG: A·dokni BJP, sorkarini department-rangko mol·molanio u·iatanirangko on·na chu·sokjani gimin Right to Information (RTI)- Act-ni niamko pe·a ine matnangaha, salchikingni gisepo aganchakja ong·ode niamo pangchake ja·ku de·na mikrakataha.
Sorkarini bang·a department-rangan February jao RTI file ka·e mol·molanirangko indine gale donaha, RTI file ka·anina aganchaka dongja ian RTI Act-ni niamko pe·a ong·a ine BJP vice president aro Tura MDC, Bernard N. Marak, aganaha.
Mitam Community & Rural Devopment (C&RD) block aro sorkari project-rang jekai- Integrated Basin Development and Livelihood Promotion Programme (IBDLP), iarang RTI-ni gita u·iatanirangko on·china bi·aniko knachakjaha ine Marak aganaha.
IBDLP, gnigipa changna detail-ko on·na jechakaha. FOCUS Scheme-ni beneficiary-rangni gimin RTI file ka·anina aganchakjaha. Jekon 2023 assembly eleciton-na skangmangmang parakatahachim.
Ia programrangko nirokenggipa bureaucrat-rang, district official-rangko information ba u·iataniko on·jachina ge·etaha, haida project-rango scam ba cha·bokani dongakon uni gimin detail ba u·iatanirangko on·na jechakenga.
Bang·a department-rang beneficiary-rangni gimin data-ko on·na jechakaha ine Marak, aganaha.
“Bureaucrat-rang indaken dakangkua ong·ode ia project-rango dal·bea scam ba cha·bokani dongtela. Iarangni gisepon mitam department-rang information-ko on·omangba chu·onggija on·a aro mitamrangde chu·gimik talatja.”
“Salchikingni gisepo RTI-na aganchakja ong·ode, chinga niamo pangchake ja·ku de·angskagen aro nangnika ong·ode mamlako court-ona ra·anggen.”
Uandake Marak, deputy commissioner-rangni daitoko gisik ra·atangaha.
“Deputy commissioner-rangba daitoko ra·na nanga, main RTI- uamangni ning·o file ka·a. Bang·a department-rango rongtale kam ka·a dongja, ine Marak aganangkuaha.
