JJM project matchotjanina Chibinang songoni manderang nirokataniko nangnika

TURA: West Garo Hills-ni ning·o donggipa Chibinang-ni wilwila songo donggipa aro Bholarbitha-ni manderang Jal Jeevan Mission-ni ning·o Functional Household Tap Connection (FHTC) chalaiani aro ta·rake tarianganiko nangnike bi·angaha.
Gipin songrang baksana Bangalkhata, Bholarbhita, Ghuner Gaon , Borshibanda, Lower Nalbari, Charbataprara aro dingtang dingtang songrango FHTC-rangni gita nokantiona sale on·ako nikani ja·man matnangatani sokbaaha.
JJM scheme-oniko man·a ka·dongsoe uamangni janggi tangani nambatangna man·ani pal batesa chi sale on·anio namjabatgipa ong·enga, ine chittio janapataha.
“Chingni biaprango FHTC-ni gita bang·a songrangan man·kujaenga. Chingni biaprang chi bangipa biap ong·a jeni miksonganian neng·nikmiting somoio chinga tangna nangchongmotgipa naljokgipa ringani chiko nangchongmota. Ian chingko scheme-ni bidingo bang·bate gisiko jingjengatani man·ata. PHE department-ko iani bidingo niatpachina chinga mol·molaha aro ringani chirangko chingna man·e on·chinaba mol·molangaha,” ine songtangni mande aro social activist Ishraful Hoque aganaha.
Ma·mong aro a·dokoni bang·a tangka paisarang baksa Chibinango mongsonggipa dingtang dingtang project-rangko rikenga bang·a ia project-rango indakgipa tangka paisarangko namgnina jakkalanggen ine chanchia.
“Chingni chiakolrangoba ran·a maina indakpile salrang dingani a·sel chinga ran·ako nika. Ia biaprango china bilongen neng·nikani man·a aro chinga gimikan sing·gen jeon scheme-rangko a·dokni namgnina kam ka·angna nanga. Ian mijamangmang chi banani somoio jeon chinga ban·an diarrhea aro be·en bigil ka·gite saaniko chiko jakkalna name man·jani a·sel sabisirangko man·aha,” ine ua agandapangaha.
Bang·a songrango simsakgijani a·sel FHTC-rangko sale on·ako nikja jean mongsonggipa chi pipeline-rangko chibima rikam jolo songahachim aro ian chi banani a·selma ma taria namjani a·selsama bilongen namjabatako man·aha, man·pakangnaba donggnok. Indakgipa ong·taijana gita nanganniko tarie on·china ua agandapangaha.
Dingtangmancha nanggiparangna tarie on·ani kamrangko ka·e on·a man·a a·bao maiko nangenga iana name dake nirokangchina PHE baksanaba sorkariko Hoque mol·molangaha.
“Adita niamrang donga jeon chinga nimanaha aro chinga an·tangtang sandiangna TRI ka·aha. Chingni project-rangko ka·ja dipetna chinga neng·takjawa, uamang maia miksonga donga aro chinga kacharionaba re·angaigen, chinga maiko man·a nangkuenga uko man·a,” ine ua agandapangaha.