TURA: West Garo Hills a·jani Chibinang jolrango Jal Jeevan Mission (JJM)-ni Functional Household Tap Connection (FHTC)-ko matchotkujaenga aro chirangko man·tokjaenga ine songni manderang badi ka·doangani ja·man PHE department-ni official-rang aro kamko ka·enggipa contractor, songni manderangko grongenba kamrangko ta·raken matchotatna ku·rachakaniko on·angaha.
JJM-ni kamrangko matchotkujaenga aro chirangko man·tokjaenga ine Chibinang jolo donggipa Bholarbhita,Bangalkhata, Charbataprara, Borshibanda, Lower Nalbari aro Haribhanga songni manderang badi ka·doangani ja·man PHE-ni official-rang, JJM-ni contractor baksa songni manderangko grongenba, ia kamrangko ta·raken matchotatna ku·rachakaniko on·angaha.
Koborko on·ani gitade, ia project-rangko BAC Infratech jako ra·e ka·engachim.
Jolo songdongenggipa manderangni parakatani gitade, JJM-ni FHTC ba nokdang ge·antionan chi pipe chate on·aniko aro chirangko sokate on·na gita official-rang ku·rachakaniko on·angaha.
Ia jolrangara chi banronggipa biaprang ong·ani gimin da·o chirang banna skangan kamrangko matchotate on·china gita songni manderang, PHE official-rangko didiataha.
