Williamnagar: Meghalaya State Legal Services Authority (MSLSA), Meghalaya sorkarini Health and Family Welfare, Social Welfare, Education, Fisheries, Soil and Water Conservation, Textiles, Election, Agriculture, Horticulture department-rang baksa bakrime National Legala Services Authority (NALSA) scheme aro sorkarini welfare scheme-ni bidingo ‘Back to School’ ingipa theme ba pangchakaniko done Rongrenggre Govt. Higher Secondary School playground-o Sonibar salo salsana dalgipa camp-cum awareness programko ong·atangaha. Jeon bang·a manderang bakko ra·tokaha.
Programo Meghalaya High Court-ni Judge Justice HS Thangkiew, MSLSA-ni Executive Chairman- uamang chief guest ba mongsonggipa sokgipa ong·e bakko ra·angaha.
Education ba skia poraianira bi·sarangna dingtang dingtang bang·bea cholrangko on·a, uni gimin nokdang ge·antian bi·sarangko poraichina didina nanga ine Thangkiew aganangaha.
Covid-19 sajinma sokani somoio bang·a bis·arang school-oni chel·e dongna nangaha aro mitamrangde nokdango tangka-paisani gimin neng·nikako man·e poraina cholko man·ja. Niatgenchimode da·oni literacy rate ba skia poraiani rate-ara 75% ong·a aro an·ching a·dokni education system nambea, ian bang·ata bi·sarangko school-ona rimbataina cholrangko on·a ine Thangkiew, agankuaha.
Iarangni gisepon state legal service authority-ni songsalni cholgri manderangna indin legal service-ko on·ne dakchakani giminba aganangaha. MSLSA, bi·sarangni education-na mingsa programko a·bachengataha.
Social Welfare Department-ni Joint Secretary Sabrella B Marak, uni department-ni dingtang dingtang scheme aro programni namgnirangko u·iate on·angaha. Mission Shakti aro Mission Vatsalya-ni gita beneficiary-rang bang·en namgniko man·enga. Iarangni gisepon Deputy Director of School Education and Literacy, RZ Das, education department-ni school-oni ong·katgipa ba poraia dontonggipa bi·sarangko school-ona rimbapilna ja·ku de·ani gimin parakataha. Uandake East Garo Hills-ni ge·sa school-ko NIOS-ona ra·doataha ine u·iataha.
Programo East Garo Hills-ni DM&HO Dr. CEN Sangma, National Health Mission-ni gita health department-ni parakatagipa financial aro non-financial scheme-rangni gimin talate on·angaha.
Williamnagar-ni District and Sessions Judge BM Joshi, programo rimchaksoani kattarangko aganangaha, ADC DA Sangma, mittelpilskani kattarangko aganangskaha.
Iarangni gisepon Justice Thangkiew, “Back to school” campaign-ko parakataha aro ge 11 NIOS centre-rangko parakate on·angaha. Una agreba school drop out ba school poraianiko dontonggipa chatro-chatrirangna Symbolic Certificates-rangko suale on·angaha. Be·en-bimangni gita bilgrigiparangna assistive device-ko suale on·aha. Sorkarini dingtang dingtang scheme-rangni beneficiary-rangna cheque aro work order-ko suale on·angskaha.
Sorkarini dingtang dingtang department-rang uamangni service, sheme-rangni gimin manderangna u·iatna stall-rangko donaha.
