SHILLONG: Adita salrangna skang, West Garo Hills a·jani Dadenggre jolo donggipa Lower Teksragre songo me·chik saksako kragija dake doka satanina rim·ako man·gipa manderangna niamo pangchake rakgipa sastirangko on·gen ine Sukrobar salo, a·dokni Chief Minister Conrad K Sangma, ku·rachakaniko on·ataha.
Ia me·chikko dokanina police-rang da·o dipet sakdok manderangko rim·na man·ahachim.
Iandake me·chikko dokani gimin an·tangni suk ong·gijaniko parakatengon, “Iandakgipa kamrangko sorkari raken jegalenga aro je manderangan ia dosko dakahachim, sorkari niamo pangchake nanga gita sastirangko on·anggen,” ine Chief Minister, kobor ra·timgiparangna aganaha.
Ia me·chik maiba ong·gija kamko ka·genchimode uko bichal ka·e sasti on·na gita a·songo kachari aro police-rang dongachim ine janapatengon, “Ia me·chikko iandake doka sataniara ong·jaha. Mande maiba ong·gija kamko ka·ode uko pangnan ain gitasa sasti on·na nangachim aro manderang skatang niamko jako ra·na bil dongjachim. Niamko jako ra·e mandeko skatang sasti on·aniara niamni a·palo ong·ani gimin je manderangan ia ong·gija kamko ka·anio jak donga, uamangni kosako sorkari niamo pangchake sastirangko on·anggen,” ine Sangma parakataha.
