TURA: Garo Hills-ni Sonja Wildlife Rescue Centre-o donenggipa hurorangko Ri Bhoi a·jani Umtrew-o gital kulienggipa State Zoo baksana gipin biaprangonaba apjitangna gita sorkari manchiengon, Garo Hills-ni hurorangko gipin biapona apjitna manchianiko jegalanirang Garo Hills-o jangbatrorobaengaha.
Robibar salosan iani bidingo Garo Hills-ni dingtang dingtang dolrang, a·dokni Chief Minister-na sedoatenba, ia centre-o donenggipa hurorangko gipin biaprangona apjitangjachina mol·molatahachim aro apsan daken Sombar salo, East Garo Hills aro South Garo Hills a·jani A·chik Organisation for Social Welfare (AOSW) dolba, iako raken jegalataha aro Garo Hills-ni hurorangko gipin biaprangona ra·angjachina a·dokni Chief Minister-ko didiataha.
“Ia matburingrangara Garo Hills-ni mikkim aro chengonin A·chikrangni mande ra·e ripingbagipa matburing ong·a aro ia matburingrangko Garo Hills-oniko gipin biaprangona ra·jitanggenchimode ian matburingrangna kenna nangani ong·naba gnang,” ine AOSW-ni dilgiparang, Chief Minister-na sedoatgipa chittio parakataha.
Sonja Wildlife Rescue Centre-ni hurorango gipin biaprangona ra·angani pal, biaptangon nambate ripinge rakkina gitasa cholrangko ra·gatchinaba AOSW, a·dokni Chief Minister-ko didiataha.
“Garo Hills-o donggipa hurorangara namen dingtangmanchagipa ong·a aro ia hurorangara Garo Hills-ni dikbegipa buringrango donggiparangsa ong·ani gimin ia hurorangko zoo-rangona ra·anggenchimode uamangni dakbewalrangba dingtangnaba gnang,” ine AOSW-ni dilgiparang parakataha.
AOSW-ni parakatani gitade, International Union for Conservation of Nature (IUCN)-ni dongimin niamrangon gimaangenggipa matburingrangko uamangni dongchakram biaprangon donchina u·iatmanahani gimin saliramni hurorangko Guwahati Zoo aro Lucknow Zoo-ni hurorang baksa te·srena manchianiara niamko pe·ani gitaba ong·engachim.
