TURA: Re·anggipa salrangonin mikkarang jimbee waenganichi Garo Hills-ni dingtang dingtang biaprango a·arang ruronganiko bang·en nikna man·angaha aro uandaken a·arang be·dapanichi badiaba badiaba biaprango nok-jamrang nosto ka·ako man·angan baksana rama jal·langrangba champengatako man·angaha.
Tura-oba Robibar pringonin mikkarang dontonggija waangahani a·sel Sombar pringo, bang·a biaprangon a·a be·anirangko nikna man·aha aro uandaken Tura-ni Upper Chandmari aro Deran Gittim-o nok te·gniko a·arang be·dape nosto ka·angaha.
A·arang be·dapanichi Tura-ni Gandrake Dare aro Dobasipara joloba ramarang nosto ong·aniko nikna man·aha.
West Garo Hills a·jani Deputy Commissioner Jagdish Chelani-ni u·iatani gitade, mikkarang dontonggija waanganichi Selsella C&RD Block-ni song damsa damgnio chirang banna gita a·bachengaha indiba da·o dipet obostarang bilongsrangade ong·kujaenga.
Selsella Block-ni ning·o donggipa Sankarpara songo chirang banahani a·sel manderangni nokrangko chi mripaha aro uandaken ia songni manderangko, skul nok aro community hall-ona apjitataha ine Deputy Commissioner parakataha.
South West Garo Hills a·jaoba batanggimin salrangonin mikkarang dontonggija waengani a·sel Bainapara, Betasing-Mellim rama be·wakangaha aro uandaken da·o ia rama gita gari gorarangni re·ruraaniko District Administration champengatchengna nangaha ine kobor on·aha.
Garo Hills-ni gipin a·jarang, chong·motan East Garo Hills, South Garo Hills aro North Garo Hills a·jarangoba mikkarang jime waanganichi a·arangni be·anirangko nikna man·aha. East aro South Garo Hills a·jao Simsang chibimani dal·baroroaniko changsataie nikna man·aha aro mikkarang waangkugenchim ong·ode samba jolrango songdongenggipa manderangna kenchakna nanganirang donga ine official-rang u·iataha.
Mikka jime waanganichi GH-o nokrangko a·a be·dapa, rama jal·langrang champengatako man·a
Date:
Share post:
