SHILLONG: Bangladesh a·songona niam gri chini aro rasinrangko badingsrukani komianggnok ine Bristibar salo, BSF Meghalaya Frontier a·kangataha.
Iani bidingo kobor ra·timgipa manderang baksa agangrikengon, Lok Sabha election-ni a·sel a·doko BSF sipairang komiahachim indiba da·ode sipairangko bang·bate rimbadapengaha ine BSF Meghalaya Frontier-ni Inspector General (IG) Harbax Singh Dhillon parakataha.
Bangladesh a·songona niam gri chini badingsrukani komianggnok aro da·on komiangengaha ineba ua aganaha.
“A·song damgnini simarango nirokna gita sipairangko bang·bate donatahani gimin niam gri chini badingsrukani komianggnok,” ine Dhillon aganaha.
Iani bidingo BSF-ni official-rang, a·dokni Chief Minister, Deputy Chief Minister, Home Minister, Chief Secretary aro DGP baksa agangrikaha aro uamang Border Guards Bangladesh (BGB) baksaba agangrikaha ineba BSF Meghalaya Frontier-ni IG parakataha.
Dhillon-ni aganani gitade, chini badingsrukani bidingo mitam manderangsa social media-rango tol·e jangbingbangatna jotton ka·enga indiba social media-rango niksoenggipa mitam noksarangde kakket ong·jachim.
Chini badingsrukanirango bak ra·jachina songni manderangko didina gita NGO-rangko mol·molna nangenga ineba BSF official aganaha.
“Manderang iandake niam gri kamrangko ka·gija an·tangtangna dingtang cholrangko sandina nanga. Sima jolrango songdongenggipa manderang lekka poranio gisik on·batna nanga. An·chingba manderangna dingtang janggi tangani cholrangko on·anio dakchakna nanga,” ine ua aganaha.
BSF aro BGB-ni tom·aniko salbrina ong·atanio uamang, a·song damgnini simarango niam gri silchidare aro ma·manti bostu badinganiko champengna apsan ja·kurangko de·na chanchirimaha ineba BSF Meghalaya Frontier-ni IG parakataha.
