SHILLONG: Meghalaya a·dokni me·chikrangkoba police dolrango napchina gita salgro salaram jol gimikni skanggipa me·chik Director General of Police (DGP) Idashisha Nongrang didiangaha.
Iani bidingo kobor ra·timgipa baksa agangrikengon, me·chik police-rangni battalion-ko kulina nangengani gimin, a·songni gadango a·dokni me·chik police-rang komiengani gimin aro uandake me·chik police-rango nangchakegipa dingtang dingtang kamrangni gimin a·dokni DGP janapangaha.
An·tangni bilsi 30-na police ong·e kamko ka·enggipani bidingo janapatskaengon, sipairangni kamo me·asarangsan ong·aigija me·chikrangkoba bak ong·na nangenga ine Nongrang aganaha.
“Police-ni kamrangoba me·chikrangni daitorang bang·e dingtanggrikja aro anga an·tangan saksa me·chik ong·e police-ni kamko ka·anio chu·ongnikanirangko man·a,” ine ua aganaha.
Police-ni kamko me·asani kam ine chanchitokbata ine janapatengon, “Ia chasongni a·gilsako police-ni kamko me·asanisan ine anga an·tangde aganjawa. Me·chikrangba da·ororo police dolrang baksana Army-rango naptokengaha,” ine DGP parakataha.
Rake kamko ka·achisa chu·sokgipa ong·na man·a ine janapatengon, an·tangtangni miksonganirangko chu·sokgipa ong·atna gita an·tangtangko on·kange aro bimchipe kam ka·china ua dambe me·chikrangko didiangaha.
Me·chikrarani battalion-ko bikotanichi dingtang dingtang kamrangko nambate chu·sokatna man·gen ineba a·dokni me·chik DGP aganaha.
Me·chik police ong·e kamko ka·anio basakoba ua cholgri ong·e nikarang dongama ine sing·anina aganchakaniko on·angengon, “Da·o dipet anga iandake cholgri ong·e nika dongkuja maina nokdangni gitaba angna pilak kamrangon dakchakanirangko on·a. Angni segipani nokdangni gita aro angni nokdangoniba angni kamrangko ka·anio da·o dipet maming champenganirangko man·a dongkuja,” ine Nongrang aganaha.
