SHILLONG: Da·al Sukrobar salni bako, Development of North Eastern Region (DoNER) aro Communication-ni Union Minister Jyotiraditya M Scindia, Meghalaya a·dokni skotong Shillong songjinmaona re·baenga.
Shillong ua, DoNER Ministry, NEC aro a·dok sorkarini official-rang baksa Nongrim Hills-o donggipa NEC Secretariat-o tom·e dingtang dingtang project-rangni kamrangko nipilanggen.
Uni re·baani mongsonggipa miksonganiara, NEC Vision 2047-ko mesokani aro NERACE App-ko a·bachengatanian ong·gen.
Ia NERACE App-ara, salgro salaram jolrango game ge·e cha·enggipa manderangna, a·gilsakni dingtang dingtang market-rang baksa agangrike, bading chiwalgrikanirangko dakna cholko on·anian ong·enga.
Ia NERACE App-ko English, Hindi, Assamese, Bengali, Nepali, Khasi, Mizo, aro Manipuri ku·sikrangchi tariaha aro ian salgro salaram jolrango game ge·e cha·engggipa manderangna a·gilsakni gipin market-rang baksa agangrikna cholko on·enggipa helpline ba dakchakani ong·enga.
Ia NERACE App-ko a·bachengate on·angani ja·man salgipino Union DoNER Minister, Assam a·dokni Guwahati songjinmao donggipa NEDFi House-ona re·ange, salgro salaram jolrango bading chiwalani kamrangko tang·doatani bidingo official-rang baksa agangrikangskagen.
Uni re·bana salsa skang Jyotiraditya Scindia, Meghalaya aro Assam a·dokrangona re·bae, a·dok damgnio namroro silroroani kamrangko nieana gita kusi ong·aniko parakataha.
