SHILLONG: Chief Minister, Conrad K Sangma Sukrobar salni 12 bajio agangrikna KSU-ko uni kutiriona okamata.
East Khasi Hills Deputy Commissioner-ni chitti seatako uamang da·omangmang man·soaha ine KSU general secretary, Donald V. Thabah Bristibar salo u·iataha.
KSU memborrang baksa tom·aniko ong·atangna CM-ni okamatgipa somoi sokbaa jensalo student-ni body-ni gita gipin biaponi kam ka·e cha·na re·bagiparangko sandianiko dakangna ka·mikenataha.
Butbar salo, KSU-ni president Lambokstarwell Marngar u·iataha, sak 2,500 gipin biaponi kam ka·na re·bagiparang jemangan chu·sokgipa lekkarangko mesoke on·a man·jaha uamangko rim·aha aro batanggimin sal 12-ni gisepo Khasi aro Jaintia a·ja gimiko dingtang dingtang nokrangko rikgiparang biaprango lekkarangko sandiananiko dakani somoio students’ union-ni gita chu·gimik lekkarangko mesokna man·gijagiparangko watatpilaha.
Chief Minister’s Office baksa pressure group-rangni dilgiparang grongna bi·enga ine Deputy Chief Minister Sniawbhalang Dhar kobor ra·timgiparangna official-ni gita ong·gija u·iataha.
“Dingtang dingtang pressure group-rangni gita nanganirangna aganangna chinga tariaha. Anga ka·donga pressure group-rangni dilgiparang aro CM baksa tom·anio da·o ong·enggiparangko bon·atna man·aba donga,” ine Dhar aganaha.
Labour department-ni gita kam ka·a komiani donganina ua aganangaha, iano maiba neng·nikani donga ong·ode iako ramao namatna man·gipa ong·ja aro iarang gimikna namatani cholrangko sandina chanchianiko dondime agannaniko nangenga.
