SHILLONG: ‘Equal pay for equal work’ ba apsan kamna apsan dormahako on·na nanga ine Meghalaya High Court-ni adita salrangna skango rai on·anichi, sak 1,300-na batpilgipa MeECL-ni casual aro contractual worker-rang namgniko man·gnok ine ka·dongsoenga.
Namgniko man·nasienggipa casual aro contractual worker-rangni gisepo, cleaner, peon, Lower Divisional Assistant (LDA), meter reader-rang, bill clerk, linemen, Junior Divisional Assistance (JDA) man·chapgen aro gipinrang dongkuenga.
MeECL Progressive Workers Union (MPWU)-ni petition on·gipani bidingo Meghalaya High Court-ni single bench, jeon Justice Wanlura Diengdoh skotong ong·a, ua re·anggipa July 15 tariko knaaniko dakaha aro Annexure- A / 3 -o jemangni bimingrangko segatahachim, uamangna apsan kamko ka·gipana apsan dormahako on·aniko ja·rikchina gita ge·etaniko on·aha.
Indake ong·engon, rai on·gipani certified copy-ko man·soani jagnini gisepon kamrangko matchotatchina gitaba Justice Diengdoh aganaha.
Unomitingo, MPWU-ni memborrang, Sukrobar salon re·anggipa somoio rai on·gipani bidingo Meghalaya High Court-ni on·gipa certified copy-ko MeECL-ni management-na on·eaha, ‘equal pay for equal work’ niamko ja·rikchina gita ge·etaniko on·ahachim.
Union president, Mantiphrang Lyngdoh Kiri, court-ni rai on·gipa certified copy-ko MeECL CMD-ni PA, Sanjay Goyal-na on·aha.
“Equal pay for equal work-ko ja·rikchina rai on·anina chinga High Court-ko mittela, maina chinga iana ru·uten sengaha” ine MPWU president, Court-ni certified copy-ko on·eani ja·mano aganaha.
Ian historic judgment ba rai ong·aha, maina da·ode uamangni man·gnirangko apsan man·gnok ineba Union dilgipa aganaha.
