Tura/Shillong: Rangsakona-ni MLA, Subir Marak, Shillong MBOSE Guest House-o kam ka·gipako chowkidar-ko gate ona ru·utani gimin satkape, an·tangna neng·nikaniko ra·baaha.
Kobor man·soani gita, July 16 tariko pring walni 2 bajimango Rangsakona-ni MLA, teacher-rang baksa Guest House-ona re·angaha. MLA, teacher-rangko mi cha·na gita okamaha, aro uni ja·man teacher-rangko guest house-ona rimangpilani somoio ia obosta ong·aha. Pring walni 2 bajio chowkidar, tuchipani gimin gate-ko oningna man·jaha.
Uni gimin MLA ka·onange gariko honk ka·petpeaha, minit 30 ja·manba gate-ko kulijani gimin saksako gate gita gadoe chowkidar-ko okamna aganaha. Indake gate-ko gadoe okamani ja·man chowkidar, tusia mikgilchi jamang jamang dake gate-ko kuliaha. Indiba MLA, gate-o ru·ute sengna nangahani gimin ka·onange gatekeeper aro uni jikgipa baksa nanggrikaha. Unomitingo MLA, chowkidar-ko satkapaha, ong·a obostako guest house-ni CCTV-o nikna man·aha. Jean social media-o gipangaha.
CCTV footage-o Subir-ni chowkidar-ko satkapako talen nikna man·aha. Social media-o gipahani gimin a·dokni manderang MLA-ko sing·doengjok.
Iarangni gisepon MLA, ong·a obostana suk ong·gijako parakataha indiba gate-ko kuliningjani gimin iandakgipa obosta ong·aha ine aganaha. MLA, ong·a obostana kema bi·ataha.
Minggipin da·odipet darangba badi ka·a dongkuja.
“MBOSE guest house Laithumkrah-o Garo Hills-oni re·bagipa teacher ba skigiparangna angni bimingchi book ka·aha. Uamang Education Minister aro DSEL-ni Director-ko July 15 aro 16 tariko grongna tik ka·aha. July 15 tariko angni nokona uamangko mi cha·na okamaha. Mi cha·a matchote anga an·tangan teacher-rangko guest house-ona 2 bajio rimange donaha. Guest house-ni gate-o minit 30 somoina sengahachim, uni ja·man angni PSO, gate gadoe chowkidar-ko okamaha. Chowkidar-ni jikgipa seng·adake aganaha, uni gimin anga satkapaha, indiba anga iako dakna nangjachim, saksa public representative ong·e satkapna nangjachim indiba iarang ka·onangani a·selsa ong·aha. Anga chowkidar-o kema bi·aha ine Subir, ong·a obotako talataha.
MLA baksa dongpagipa teacher-rang, MLA-na chakpaataha. Aro social media- o uni video gipani gimin suk ong·gijako parakataha.
