TURA: Re·anggipa July-ni 19 tariko Nokma Council-ni tom·aniko ong·atangenba, Garo Hills-ni dambonga a·jarango Village Council songna miksonganiko raken jegalataha.
Ia tom·aniko ong·atani bidingo talataniko on·atengon, Garo Hills-ni dambonga a·jarangon Village Council-rangko songaniara Nokmarangna on·gimin bilko pe·ani gita ong·gen aro Village Council-ni ning·o baditaba sak A·king Nokmarangko man·chapna siengani gimin ian Nokmarangni gisepo ma·sisretgrikaniko ong·katatani ong·gen ine nikenba pilak Nokmarangan, Garo Hills-o Village Council songaniko raken jegaltokaha ine Nokma Council-ni president parakataha.
“Village Council-rangko songanichi Nokmarang an·tangtangni bilrangko gimaatgen aro ian Nokmarangni gisepo meligrikgijaniko ra·baani ong·gen,” ine Nokma Council-ni president parakataha.
MNREGA-ni ning·o jekai Nokmarangna bilko on·ja apsan daken Village Council-rangko songanioba Nokmarangni bilko ra·sekani gita ong·gen ineba Nokma Council-ni president parakataha.
“Uni gimin Village Council songani draft-ko mesokkujaskal aro Nokmarang baksa iani bidingo apsan asonge chanchirimkujaskal Garo Hills-ni dambonga a·jarango Village Council songaniko chinga Nokmarang raken jegalenga,” ine Nokma Council parakataha.
Nokma Council-ni parakatani gitade, da·o ong·enggipa Parliament Session-o Indian Constitution-ni Sixth Schedule-ko taridapna Bill-ko ra·gatahani gimin Garo Hills-ni Nokmarang kenchaksoenba, Garo Hills-o Village Council songaniko raken jegalsotokaha.
