TURA: Rongjeng-Adokgre-Bamil PMGSY ramako East Garo Hills (Williamnagar Division)-oniko South West Khasi Hills (Mawshynrut Division)-ona apjitangskana manchianiko A·chik State People’s Front (ASPF) Williamnagar regional unit jegalenba, PWD Williamnagar-ni Sub-Divisional Officer (SDO)-na sedoataha.
Iani bidingo PWD Williamnagar-ni SDO-na badi ka·e sedoatengon, ia ramara East Garo Hills a·jani manderangna mongsonggipa rama dilsa gita ong·engani gimin ia ramako South West Khasi Hills a·jaona apjitataniara jolni manderangna gimaani ong·gnok ine ASPF Williamnagar unit parakataha.
Ia ramako SWKH-ona apjitataniara, jolni manderangna re·ruraanirango neng·nikanirangko on·anisan ong·aigija East Garo Hills a·jao namroro silroroani kamrangko champengani gitaba ong·gen ineba ASPF Williamnagar unit parakataha.
“Ia PMGSY ramako gipin division-ona apjitaniara East Garo Hills a·jao songdongenggipa manderangni man·na nanganiko ra·sekani ba gimaatani gita ong·enga. Iandakgipa rama jal·langrangko chalaianio PWD-ni nanganirangko sorkari ma·sichakna nangchongmota,” ine ASPF Williamnagar unit-ni dilgiparang parakataha.
Jolo songdongenggipa manderangni namgnina ia ramako gipin a·jani division-ona apjitatna gita on·gimin ge·etaniko ra·pilchinaba ASPF Williamnagar unit, a·dok sorkariko didiataha.
