SHILLONG: Rangsakona NPP MLA Subir Marak-ni daka kamara rasong siani aro party-na namgija bimingko ong·ataha ine National People Party (NPP) Sukrobaro parakaha.
“Ian rasong siani ong·aha, jekon pilakan inaignok. Ian sakgni manderangni gisepo jegrikanisan ong·a aro da·o namatna man·aha” ine NPP-ni a·gipi dilgipa aro Assembly Speaker, Thomas A Sangma aganaha.
Marak, re·anggipa July 16 tariko Laitumkhrah-o donggipa MBoSE guest house-ni saksa caretaker-ko doka-satahachim, jenan ua ja·mano kema bi·aha.
A·sel ong·gipani bidingo bang·e aganangkuna jechakan baksa ‘‘ian sakgni manderangni nanggrikanisa darang political dolchiba nangeja aro anga chanchia uamang sakgnini gisepo namgrikaha,” Speaker aganaha.
“Unigimin maming agandamna nangani katta dongja, maina uamang kema ka·grikaha aro mamlako jako ra·angkuna chanchijaha,” ua agandapaha.
Unaskango, NPP dilgipa aro cabinet minister Marcuise Marak, indakgipa bewalrangko party ra·chakna man·ja ine aganahachim.
“Iandakgipa kamrangko ra·chakna man·ja aro mikkangchide daktaijachina chinga legislator-ko aganaha” ine Marak aganaha.
