Union Budget-ni bidingo tom·anio ma·mong Minister Sonowal bakko ra·a

Shillong: Da·al dingtang dingtang a·dokrangoni chadamberang aro me·chikrang baksana business community-ni dilgiparang baksa Union Budget-ni bidingo agangrikanio Union Minister of Ports, Shipping & Waterways, Sarbananda Sonowal  bak ra·angaha. Union Budget 2024-na dongimin provision-ni bidingo agangrikangaha jean ‘Viksit Bharat’-na nikjumanggipako bimang ong·atna ramarangko tariangengaha. Salgro salaram a·dokrang jeon ia budget-oni namgnina chadengna namen mongsonggipa role-ko kal·anggen jekai a·dokni economic, industrial aro agaricultural a·barang baksa chadamberang, me·chikrang aro tribal jatrangko bildapatna iano miksonga ine Sarbananda Sonowal aganaha.
“Salgro salaram a·dokrangni chadamberang, me·chikrang aro tribal jatrangni kam ka·ani baksa economic, industrial aro gama ge·ani a·barangko bilakpatna miksonge budget-ko skanggipa ong·e donan baksa chamaha. An·chingni Prime Minister Shri Narendra Modi an·chingni nitogipa salgro salaram a·dokrangko ‘Astalakshmi’ dake biming donaha aro da·o India-ni dal·roroanina gital engine ong·aha. Modi-ni dilani ning·o tangka kror 13,000-ko chaman baksa komigipa 200%-ni gita tribal jatrangko bilakdapatna ia budget-o baridapani provision-ko donaha jekon tribal jatrangni namgnina jakkalanggen. An·ching jatrangni artist-rangko, craftman, Self Help Groups (SHG)-rang, Scheduled Tribe aro Scheduled Castes, aro me·chik entrepreneur-rangko bilakdapatna scheme-rang jekai PM Vishwakarma, PM SVANidhji, National Livelihood Mission aro Stand Up India-na ia budget-o chamaha. Ian dam 63,000 songrango songdonggipa tribal jat sak kror 5 manderang joljolan man·gnirangko man·gen,” ine Tribal communitty-rangko bilakdapani bidingo tom·anio Union Minister Sarbananda Sonowal aganangaha.
Salgro salaram a·dokrangko man·chape songadambatgipa biaprangona salkari gimikni nangdimaniko on·a Pradhan Mantri Gram Sadak Yojana-ni VI-gipa gadang baksa rika cho·aniko bilakatna Union Budget 2024 tangka paisani gita dakchakaniko on·angna tariaha. 2014 bilsioni chu·gimik tangka kror 2310.76 korosrang baksa Meghalaya a·dok gimiko km 3,482 ramarangko PMGSY tarie on·manaha. Salgro salaram a·dokrangna rural infrastructure-ko man·chapate rural development-na kror lak 2.66-ni provision-ko budget tariaha. Meghalaya-ko man·chapate a·dokrango tourist-na rika cho·aniko nambate dakna miksonge highway ramarangko tarina aro salgro salaram a·dokrangni ramarangko namdapatna Union Budget 2024-o tangka kror 19,338-ko chamaha.
Meghalaya sorkarini Animal Husbandry Minister Alexander Hek, Sanbor Shullai, MLA & Chairman, Meghalaya Tourism Development Corporation (MTDC); Rikman G Momin, President, BJP (Meghalaya) aro PS Shukla, Vice Chancellor, Northeastern Hill University (NEHU) tom·anio dongpaaha.