SHILLONG: Budbar salo, Meghalaya a·dokni Indo-Bangla simao donako man·enggipa Border Security Force (BSF)-ni sipairang, Bolero pik up gari bolbrio gate ra·angenggipa mang 69 matchurangko jokatenba, niam gri matchu badingenggipa India-ni sakdok manderangko, West Garo Hills a·jani simaoniko rim·na man·aha.
Koborko on·ani gitade, 100 Battalion BSF-ni sipairang, Meghalaya Police baksa nangrime, niam gri badingenggipa manderangko am·sandianio, Dalu samba jolo donggipa simaoniko mang 69 matchurangko jokatna man·aha. Ia matchurangko Bangladesh a·songona palsrukatna ra·angengachim ineba u·iataha.
Ia matchurangko jokatna man·ani ja·man niam gri matchu badingenggipa India a·songni sakdok manderangkoba BSF aro Meghalaya Police-rang rim·na man·aha.
Ja·mano jokatna man·gipa matchurangko aro rim·a man·gipa manderangko Dalu police station-na pakwate on·ataha.
