TURA: Dadenggre Civil Sub-Division-ni Sub-Divisional School Education Officer (SDSEO)-ni kosako matnanganirangna Rajabala NGO-rang aro skigiparangni gisepo meligrikgijanirangko nikna man·engon, adita salrangna skang badiaba skul headmaster-ni kosako me·chik self help group (SHG) badi ka·ahani gimin SDSEO-ni inquiry dakengmitingo Rajabala-ni NGO-rang inquiry dakna on·gija golmal ka·aha ine Rochonpara Deficit UP School-ni headmistress Margareth R Sangma-ni matnangataniko Rajabala-ni NGO-rang , chong·motan GSU, FKJGP, ASPF aro ACHIK dolrang jegalatskaaha.
“Chinga Rajabala-ni NGO-rang, ua inquiry dakaniko maming dakeba golmal ka·a dongja aro chingko okamaba dongjani gimin chinga uanona re·angaba re·angja. Margareth R Marak-ara sawa aro banoni? Mai dake ua gipin skulrangni gimin name ma·sichenggija skatang aganenga. SHG ine me·chikma dolko janapatengon, ua mamingkoba ma·sigija tol·e agananisan ong·aia. Uni mamingkoba ma·sigija skatang talataniko chinga raken jegalatenga,” ine Rajabala-ni NGO-rang parakataha.
July-ni 24 tariko Dadenggre-ni SDSEO, inquiry dakna re·anga ine agananiko jegalatskaengon, ia officer July-ni 23 tarikosa inquiry ka·eahachim aro ia headmistress-ni skatang matnanganiara mamingkoba ma·sigija matnanganisan ong·aia ine Rajabala-ni NGO-rang parakataha.
