SHILLONG: Meghalaya a·dokara transit state ba gipin a·dokrangona re·pakgipa a·doksa ong·ani gimin a·doko Inner Line Permit (ILP)-ko ra·gatchina dabianiko chu·sokgipa ong·atna gitade name chanchirimna nangenga ine Nongkrem-ni gitcham MLA aro da·o ong·enggipa MDC Lambor Malngiang aganaha.
Iani bidingo kobor ra·timgipa manderang baksa agangrikengon, salgro salaram jolo ILP donggipa Manipur aro Nagaland gita dakgipa a·dokrangara Myanmar a·song baksa sima nangchapgipa ong·a aro gipin a·dokrangona re·pakna nanggipa a·dok ong·ja indiba Meghalaya a·dokara Assam baksa sima sualgrikgipa ong·skaa ine Malngiang parakataha.
“Uni gimin iandake gipin a·dokrangona re·pakna nanganikosa skanggipa chanchina nangani ong·enga indiba chinga an·tangtangba ILP-na dabianio chakpaaniko on·enga,” ine ua aganaha.
2019 bilsio ILP-ko ra·gatchina ma·mong sorkario dabie Assembly-o resolution-ko ra·anichi dingtang dingtang dolrangko MDA-I sorkari togiaha ine Voice of the People’s Party (VPP)-ni president Ardent M Basaiawmoit-ni matnanganikoba ua raken jegalataha.
“Chinga maikai a·dokni dolrangko togiaha? ILP-na resolution ra·gipani bidingo Union Home Minister baksa agangrikna gita chinga baditaba chang New Delhi-ona re·angaha aro chinga Prime Minister baksaba agangrikaha. Manderangko chinga cha·bokaha ine matnangenggiparangna anga iakosan aganna ska, chong·motan resolution-o soi ka·giparangoni da·o VPP-o ong·enggipa MLA saksaba ua somoio soi ka·aha,” ine Malngiang parakataha.
2019 bilsio ILP-na resolution-ko ra·anio da·o VPP-ni MLA ong·enggipa Adelbert Nongrum-ba soi ka·ahani gimin ua ia kattarangko aganaha.
Meghalaya a·doko ILP aro Meghalaya Residents Safety & Security Act (MRSSA)-ko ra·gatchina dabie dingtang dingtang dolrang, a·palrangoni re·bae kam ka·enggipa manderangoniko lekkarangko am·sandienggipani gimin janapatskaengon, NGO-rangba ILP-ko nangnikenga aro apsan daken chingaba iako nangnikenga,” ine Nongkrem-ni gitcham MLA parakataha.