SHILLONG: Gipin biaprangoni re·bae kam ka·e cha·enggipa manderangni bidingo nambate am·sandina man·na gita Meghalaya Identification, Registration (Safety & Security) of Migrant Workers Act 2020-ko Sukrobar salo Meghalaya sorkari taridapaha.
A·dokona re·napbae kam ka·e cha·enggipa manderangni nokdangrangni bidingo am·sandina aro ong·gija kamrangna biming man·gijagipa manderangsan Meghalaya a·doko kamrangko ka·e cha·na man·na gita a·dok sorkari, dingtangmancha Crime and Criminal Tracking Network System (CCTNS)-ko jakkalanggen.
CCTNS system-o man·gipa data-rango pangchake a·dokni police-rangba, gipin biaprangoni re·bae kam ka·e cha·enggipa nokdangrangni bidingo am·sandina man·gen aro gipin biaprangoni re·bae kam ka·e cha·enggipa manderangko register ka·anio Labour department, police-rang baksa nangrime kamko ka·anggen.
Niam pe·giparangoniko dai ra·aniko gong 5000-oni lak 1-ona bariatna gita aro dos daktaitaigipa manderangko jagittamna batgija pattoko donna gitaba sorkari tik ka·angaha.
Meghalaya a·doko ong·gija dakanirangko bariatjana gita aro gipin biaprangoni re·bae kam ka·e cha·enggipa manderangna dongimin niamrangko bilakbatatna gita sorkari, ia Migrant Workers Act 2020-ko taridapaha.
