SHILLONG: Bangladesh a·songo ‘quota system’-ni bidingo jegalanirangchi so·sojengjeng ong·anirangko nikna man·engani gimin Bangladesh a·song baksa nangchapgipa pilak simarangon walni somoio curfew-ko ra·gatna gita Meghalaya sorkariba tik ka·angaha.
Bangladesh a·song baksa nangchapgipa simarang Meghalaya a·dokoba kilometer 443 donga aro Bangladesh a·songo so·sojengjeng ong·enganichi Meghalaya a·dokona niam gri katnapbana man·jana gita a·dok sorkari, pilak simarangon night curfew-ko ra·gatna tik ka·angaha.
“Meghalaya a·dokni aro a·song gimikni namgninan chinga chel·chakanirangko dakna tik ka·aha aro uandaken Sombar wal dipetan Bangladesh a·song baksa nangchapgipa pilak simarangon chinga walni somoio curfew-ko ra·gatna tik ka·aha,” ine Sombar salo, tom·e chanchirimani ja·man, a·dokni Deputy Chief Minister aro Home (Police) Minister Prestone Tynsong parakataha.
Ia tom·anio, a·dokni Chief Secretary, Director General of Police aro BSF-ni Inspector General baksana gipin official-rangba bak ra·angaha.
Ia tom·aniko ong·atani bidingo talate on·angengon, Sombar walonin a·bachenge attam 6:00 bajioni pring 6:00 bajiona zero point-oni ba a·song damgnini gisepo songgipa kimaoni a·song ning·o metre 200-ona night curfew-ko ong·atna tik ka·aha ine Home Minister parakataha.
Bangladesh a·songo ong·enggipa obostarang namkalkujaskal ia night curfew-ko ong·atanggen ineba Tynsong parakataha.
Sima jolrango songdongenggipa manderangko sorkari baksa bakrimchina didiatengon, Bangladesh a·songo obostarang namkalkujaskal, walni somoirango skatang ong·katjachina aro maiba koborrangko man·sogenchimode a·dok sorkarina ba BSF dolni official-rangna u·iatskachina gita a·dokni Deputy CM aro Home Minister u·iataha.
Bangladesh a·songo so·sojengjeng ong·engani gimin simarango nirok sandianirangko bilakbatatna gita ma·mong sorkari, BSF-ni dolsku battalion-rangko ia sima arirangona watdapataha ineba Tynsong parakataha.
Tynsong-ni aganani gitade, Bangladesh a·songo obostarang namjaengani gimin Home Affairs Ministry-ba sipai dolrangko watdapatna ku·rachakaniko on·ataha.
Meghalaya a·dokko man·chape India a·songni pilak manderangan Bangladesh a·songoni re·ongkatbana man·aha ineba Deputy CM parakataha.
1971 bilsini Bangladesh War-o dakgrikgipa sipairangni nokdangrangna sorkarini 30 percent kamrangko chamna tik ka·ani ja·man, Bangladesh a·songo jegalanirangko dake, re·anggipa jaonin so·sojengjeng ong·na a·bachengahachim aro ia so·sojengjeng ong·anio bang·en manderang so·otakoba man·ahachim.