SHILLONG: Bilsi 2018-oni Harijan Colony-o donggi-parangko jitatani kamko ka·na aganachim indiba da·onan ia mamlako mat-chotja man·kuajenga.
Indake ong·engon Sonibar salo Meghalaya sorkari, Harijan Panchayat Committee-ko agangrikanio matchotkugijagipa bidingko matchotate maiko tik ka·aha iako aganchina gita sal 15 somoiko on·aha.
HPC aro gipin Sikh body-rang Sonibar salo sorkari baksa Harijan Colony-o donggipa nokdang ge 342-ni manderangko apjitatani bidingo agangrikangaha.
Deputy Chief Minister, aro Urban Affairs-ni in charge, Sniawbhalang Dhar, meeting matchotao kobor ra·timgiparang baksa agangrikmitingo, Harijan Colony-ni bidingo agan-grikna nangkua dongenga ine parakaha. Sorkari, ua-mangna sal 15-ko on·dapna tik ka·aha, sal 15-ni gisepon uamang an·tangni chan-chirime tik ka·aniko sor-karina u·iatgen ine Dhar aganaha. Proposal aro blueprint-ko HPC-na on·-manjok. Jeon Harijan Colony-o donggipa nok-dangrangko Bishop Cotton Road, Shillong Municipal Board (SMB)-ona jitatna tik ka·aniko HPC ra·chakaha.
Delhi Sikh Gurdwara Management Committee-ni Jagdeep Singh, sorkari baksa chanchirimna tom·aniko bite gnanggipa ong·a ine janapaha.
Punjabi lane-o Punjab-oni bilsi 200 skang British chasongo rongtal-an·tala-tani kamrangko ka·e cha·na re·bagiparang dongto-kenga. Indiba bilsi 2018-o songjinmao golmal ong·ani gimin ua jolo donggi-parangko gipin biapona apjitatna dabiaha.
