TURA: Re·anggipa April jao ong·atanggipa Lok Sabha election-o Tura-ni gital Lok Sabha MP aro Congress dolni dilgipa Saleng A Sangma, BJP-ni dakchakaniko bi·aha aro BJP-ni dakchakanichisa ua chegipa ong·aha ine Tura-ni MDC aro BJP-ni state vice president Bernard N Marak parakataha.
Iako Marak, ‘Gisikni Ku·rang’ channel-o YouTuber Solly Sangma baksa agangrikengmiting somoio parakaha.
Marak-ni parakatani gitade, Lok Sabha election-ni somoio Saleng Sangma an·tangan uko grongenba, Independent candidate ong·e susajachina aro uni susaanio dakchakanirangko on·skachina mol·moleaha.
“Tura Parliamentary constituency-o candidate-ko susaatjahani gimin Saleng, BJP-ko mittelna nanga aro angaba Independent candidate ong·e susajahani gimin ua mittelna nanga. Tura Parliamentary seat-ko chena gita BJP, una dakchake on·aha indiba maini gimin ua BJP-ni kosako matnange aganskaenga anga ma·sija,” ine Tura MDC aganaha.
Tura Parliamentary constituency-o BJP susagenchimode, Congress dolni candidate, bang·gija vote-rangchisan chegipa ong·ainaba gnangchim ineba ua aganaha.
Marak-ni parakatani gitade, Lok Sabha election-o BJP, Meghalaya a·dokni constituency damgnion susagija National People’s Party (NPP)-na chakskachina ma·mongni dilgiparang ge·etaniko on·ahachim indiba Garo Hills-o BJP-na kam ka·enggipa manderang NPP-na chakpaaniko on·na siktokjaha aro Congress dolni candidate Saleng A Sangma-nan chakpaanirangko on·skaaha.
Re·anggipa April jao ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·aha aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko jadokni gisepon seoktaina nangengachim.
Lok Sabha election-o Saleng-na BJP dakchake on·a ine Bernard paraka
Date:
Share post:
